Serokatiya Erkana Pêşmerge di daxuyaniyekê de ragihand, “Mixabin duhî (22.10.2023) li Mexmûrê bûyereke nebaş rû da û di encamê de ji her du aliyan şehîd û birîndar çêbûn. Em ji malbatên qurbaniyan re sersaxiyê dixwazin û ji birîndaran re jî çakbûnê dixwazin.”
Di daxuyaniyê de hat gotin: “Em pabendbûna xwe ji bo karkirina bi Hikûmeta Federal re ji bo çareseriyeke rîşeyî û mayînde dubare dikin ku dê ewlehî û aramiyê li seranserê Iraqê pêk bîne.”
Got jî: “Em piştgiriya xwe ji naveroka daxuyaniya Fermandariya Giştî ya Hêzên Çekdar re, ji bo lêkolîneke bilez û şefaf derbarê bûyerê radigihînin, ji bo diyarkirina sedeman û dîtina çareseriyên guncaw ji bo pêkanîna ewlehî û aramiyê li herêmê.”
Ji aliyekî din ve Berdevkê Fermandariya Giştî yê Hêzên Çekdar ên Iraqê Lîwa Yehya Resûl ragihand: “Serokwezîr Mihemed Şiya Sûdanî li ser bûyera ku sê kesan canê xwe jidest dan û 7 kes jî birîndar bûn lêkolîn dişopîne.”
Resûl got, Sûdanî ferman daye ku komîteyek bilind were avakirin ji bo lêkolînkirina encamên bûyerê û diyarkirina sedemên derketina vê bûyerê.
Li gorî daxuyaniya Berdevkê Fermandariya Giştî yê Hêzên Çekdar, Sûdanî daxwaz ji hemû hêzan kir xwe bigirin û tekez kir ku divê hemû fermandar û hêzên di hemû astan de hest bi berpirsyariyê bikin.
Duhî êvarê 22.10.2023an, ji ber têgihîştineke şaş li xaleke kontrolê ya leşkerî, şer û pevçûn di navbera hêzên Pêşmerge û artêşa Iraqê de li çiyayê Qereçoxê rû da, şer û pevçûn çend xulekan berdewam kir, piştre rewş hat kontrolkirin.
