Kabîneya hikûmeta Tirkiyê îro dicive

Kabîneya hikûmeta Tirkiyê, îro 22 Tebaxa 2022an civîna xwe saz dike. Di rojeva kabîneyê de şerê Rûsya û Ukraynayê û veguhestina dexlûdanê Ukraynayê bo bazarên cîhanê, rewşa aboriya Tirkiyê û şerê li dijî “terorê” heye.

Li gor medyaya fermî ya Tirkiyê, dê geşedanên siyaseta navxwe û derve jî di rojeva kabîneya hikûmeta Tirkiyê de bin. Di vê çarçoveyê de, Erdogan dê ji endamên kabîneya xwe re behsa naveroka hevdîtinên xwe yên bi Putin û Zelensky re bike û asayîkirina peywendiyên ligel Îsraîlê jî dê bêne nirxandin.

Di mijara aboriyê de jî dê rêgirîkirina li zêdebûna bihayên kelûpelan, bilindbûna enflasyonê û projeya çêkirina xaniyên civakî bên gotûbûjkirin.

Biryarên di kabîneyê de bên wergirtin, dê piştî civînê ji aliyê Erdogan ve bo raya giştî ya Tirkiyê bên eşkerekirin.