Amedsporê tesîsên xwe ji mexdûrên erdhejê re vekir
Piştî erdhejên li Mereşê, ku bandor li 10 parêzgehên Bakurê Kurdistanê û Tirkiyê bû, Amedsporê hemû derfetên xwe pêşkêşî mexdûrên erdhejê kir û deriyên tesîsên xwe jî ji mexdûrên erdhejê re vekirin.
Roja Duşemê 6ê Sibatê erdhejeke mezin bi pileya 7.7 pileyê rîxter ku navenda wê navçeya Bazarcix a Mereşê li Bakurê Kurdistanê bû, Bakurê Kurdistanê û çend parêzgehên Tirkiyê hejand. Di heman rojê danê nîvro de erdhejeke din bi hêza 7.6 pileyê Rîxer navçeya Elbistan a Mereşê hejand.
Erdhejê bandor li Mereş, Dîlok, Riha, Semsûr, Meletî, Hatay, Osmaniye, Xarpêt, Edene û Amedê jî kir û bûye sedema wêraniyeke mezin û mirina bi sedan kesan û birîndarbûna bi hezaran kesên din.
Piştî erdhejê yekser tîma Amedsporê ragihand ku tesîsên wê ji mexdûrên erdhejê re vekirine.
Li ser hesabê xwe yê medyaya civakî Amedspor dibêje: “Ji bo gelê me yê li derve mane şorba me ya germ li Tesîsên Şehmus Ozer ên Amedsporê amade ye. Em amade ne pêşwaziyê li hemû gelê xwe bikin.”
Rêvebir û alîgirên Amedsporê bi vekirina stargehên pêbawer ji bo kesên hewcedar li Yarîgeha Tahîr Elçî 24 saetan bênavber xizmet dikin.
Hevserokên Partiya Demokratîk a Gelan (HDP) Mîthat Sancar û Pervin Buldan îro li Amedê bûn û serdana ziyandîtiyên erdhejê yên li tesîsê Amedsporê kir ku her ji destpêkê ve navenda xwe ji bo ziyandîtiyên erdhejê terxan kiribûn.
Nûvekirina herî dawî: 18:06:15
