Endamê Polîtbêroya YNKê Seîdî Ehmed Pîre dibêje, pir girîng e ,di qonaxa niha ya Kurdistanê de PDK û YNK bi hevbeşî karwanê xebata kurdeyetî yê ber bi pêşve bibin.
Herwiha di axaftina xwe de behsa civêna PDK û YNKê û got me tekez kir ku nabe li Herêma Kurdistanê gelek siyasetên cuda ligel perçeyên din ên Kurdistanê hebin.
Derbarê civêna duhî ya PDK û YNKê de, Endamê Polîtbêroya YNKê Saidî Ehmed Pîre ragihand: “PDK û YNK di dîroka xwe de gelek astengî dîtine, lê bi qurbanî, canfîdayî û gelek ziyan û zehmetî karbûn karwanê xebatê bighînin roja îro. Lê niha ji aliyê siyasî û aborî ve hinek astengî derketine, herwiha em di şerê DAIŞê de ne. Lewma jî divê PDK û YNKê vê qonaxê biparêzin û di civîna duhî de me tekez li ser çêkirina yekrêziyekê di navbera hêzên siyasî de kir û me behsa guhertinên siberojê yên navçeyê kir.”
Pîre wiha got: “Berpirsyaretiyeke dîrokî li ser milê PDK û YNKê ye û divê bi zelalî ligel aliyên siyasî biaxivin. Me di civîna xwe de behsa gilî û gazinên partiyên Başûrê Kurdistanê kir, û em li ser pirsa gendeliyê û dahatên Kurdistanê axivîn. Me got bila em dîroka xwe kirêt nekin û bila lêkolînên hûr bên kirin û yên ku kêmxemiyê dikin bên cezakirin û yên ku derew û bêbextiyan jî dikin bila bên dadgehkirin. Herwiha me behsa wê yekê jî kir ku ev herêm yek herêm e û nabe li Herêma Kurdistanê gelek siyasetên cuda ligel perçeyên din ên Kurdistanê bên meşandin û her aliyek bi awayekî reftar ligel wan perçeyên Kurdistanê bike. Divê Herêma Kurdistanê xwedî yek bername û çarçoveya siyasî be.”
Seidî Ehmed Pîre wiha got: “Îradeyeke bihêz li cem PDK û YNKê heye bo rêkeftin û çareserkirina arîşeyan. PDK û YNKê rewatî û şerîyeta xelkê bidestve anîne û Hikûmeta Herêma Kurdistanê ava kirine, lewma jî divê ev hikûmet bibe lêvegerek bo her kesekî di nava civaka Kurdistanê de. Herwiha bi PDK û YNKê gelek arîşe çareser dibin.”
