ENKS: Ciwanên Şoreşger bombe avêtin mala endamên Desteya Serokatiya ENKSê

ENKSê di daxuyaniya xwe de ragihand: “Grûpeke çekdar a ji rêxistina Ciwanên Şoreşger a ser bi PKKê, duh 19ê Cotmeha 2022yan êrîşî baregeha Neteweyên Yekbûyî û rêxistinên girêdayî wê yên li bajarê Qamişlo kirin û derî û pencereyên avahiyên wan şikandin û hewla tirsandina karmend û xebatkarên di wan avahiyan de dan, ku ev yek gefê li berdewambûna karê xizmetên mirovî yên li herêmê dixwe.”

Di daxuyaniyê de hat eşkerekirin: “Grûpeke çekdar a ser bi heman rêxistinê, îro danê sibê 20ê Cotmeha 2022yan, li bajarê Hesekê bombe avêtin mala Endama Desteya Serokatiya Encûmena Niştimanî ya Kurdî li Sûriyê (ENKS) Fesla Yûsif û mala Endamê ENKSê Mehmûd Ucê ya li bajarê Hesekê, ku di encamê de zirar û ziyanên maddî gihandên malên wan û dengê teqînan tirs û xof xiste nav xelkê.”

ENKSê ragihand ku ew bi awayê herî tund, van kiryarên tirsandinê yên li dijî rêxistinên Neteweyên Yekbûyî û li dijî nişteciyên herêmê û armackirina endamên ENKSê şermezar dike.

Encûmena Niştimanî ya Kurdî li Sûriyê (ENKS) bang li Hevpeymaniya Navdewletî ya bi serokatiya Amerîkayê dike ku berpirsyariyê hilgire û zextê li HSDê bike ji bo danîna sînorekî li ber van kiryarên tirsandinê.