PAK hejmara şehîd û birîndarên xwe aşkera kir!

Berdevkê PAKê Xelîl Nadrî ji BasNewsê re ragehand, ji destpêka şerê dijî DAIŞê heta naha Pêşmergeyên partiya wan di piraniya eniyan de beşdariya şer kirine û derbeyên giran li çekdarên wê rêxistinê dane.

Xelîl Nadrî ragehand, ku di meha Tebaxa 2014ê ve heta naha 14 şehîd û 40 birîndarên wan çêbûne, ku hemû jî kur û keçên Kurdistana rojhilat bûne û xwe kirine qurbana parastina Kurdistana başûr û Ala Kurdistanê. Herwaha got: ‘’Şehîda me ya herî dawiyê keçek bi navê Evîn bû, ku sê roj berî naha şehîd ket.’’

Berdevkê PAKê amaje bi vê yekê jî kir, ku ew di bin fermana wezareta Pêşmergeyên hikûmeta herêma Kurdistanê de şerê dijî DAIŞê dikin û got: ‘’Em fermanê ji wezareta Pêşmerge verdigrin.’’

PAK partiyeke Kurdistana rojhilate û serokê wê jî Elî Qazî ye ku kurê Pêşewa Qazî Mihemedê serokomarê Kurdistanê bû, fermandarê hêzên wan jî Husên Yezdanpena ye.