Berdevkê berê yê CENTCOM Joe Buccino got, hebûna hêzên Amerîkî li Sûriye û Iraqê “ji bo çavdêrîkirina DAIŞê pêwîst e, ku hîn jî gef e li ser cîhanê.”
Buccino di hevpeyvînekê de ligel K24ê de got: “Me ev xeletî li Afxanistanê kir dema ku em ji wî welatî vekişiyan, me dît ku DAIŞê çawa li wir çalakiyên xwe zêde kirin.”
Herwiha got jî: Pêwîst e hêzên Amerîkî li Îraqê bimînin. Serokwezîrê Îraqê Mihemed Şiya Sûdanî bi fermî ti daxwazek bo vekêşana hêzên Amerîkî û hevpeymanan ji Îraqê pêşkêş nekiriye.”
Derbarê zextên hikûmeta federal li ser Hewlêrê de, Buccino daxwaz kir ku pêwîst e Iraq fişarên li ser Herêma Kurdistanê rake û rêz li qewareya wê bigire.
Berdevkê berê yê CENTCOM destnîşan kir, vexwandina Serokwezîrê Iraqê bo serdana Amerîkayê di vê demê de “ne tiştekî baş e.”
Herwiha got: Divê fişar li ser Sûdanî bê kirin ku hejemona Îranê li Iraqê sînordar bike û Herêma Kurdistanê biparêze.
Buccino di beşeke din a axaftinên xwe bal kişande ser wê yekê ku “Piştgiriya gelê Herêma Kurdistanê, ji erkê Amerîkayê ye.”
Biryar e Serokwezîrê Iraqê Mihemed Şiya Sûdanî roja 15ê Nîsanê serdana Amerîkayê bike û li Koşka Sipî bi Serokê Amerîkayê Joe Biden re bicive.
Duhî Înê, heşt endamên Kongresê bang li Serokê Amerîkayê Joe Biden kirin ku berî serdana çaverêkirî ya Sûdanî, şert û mercan deyne ser wî, ji wan kêmkirina hejmona Îranê li Iraqê û piştgirîkirina Kurdan.
Her heşt endaman daxwaz ji Iraqê jî kirin ku bûdce û xercên darayî yên Herêma Kurdistanê bişîne û dest bi hinardekirina petrola Kurdistanê bike.
Şêwirmendê Asayîşa Netewî ya Amerîkayê Jake Sullivan jî pêştir daxwaz ji Sûdanî kiribû ku pirsgirêkên li gel Herêma Kurdistanê çareser bike û piştre serdana Washingtonê bike.
