Fermanderê Giştî yê Hêzên Sûriyeya Demokratîk (HSD) Mazlûm Ebdî ji ber mirina Serokkomarê Îranê Îbrahîm Reîsî ji gelê Îranê re sersaxî xwest.
“Sersaxiyê ji gelê Îranê yê bira re dixwazim”
Mazlûm Ebdî bi rêya hesabê xwe yê Xê peyamek belav kir û got:
“Ez ji ber wefata Serokkomarê Îranê Îbrahîm Reîsî, Wezîrê Karên Derve yê Îranê Husên Emîr Abdulahiyan û şandeya bi wan re sersaxiyê ji gelê Îranê yê bira re dixwazim.
Xweda rehma xwe li wan bike û sebirê bide xizmên wan.”
Çi bûbû?
Îbrahîm Reîsî û Serokkomarê Azerbaycanê Îlham Aliyev 19ê vê mehê li ser sînorê Îranê û Azerbeycanê bi merasîmeke fermî bendavek vekiribû.
Piştî merasîmê di rêya vegerê de helîkoptera Serokkomarê Îranê Îbrahîm Reîsî li herêma Culfayê ya Tewrêzê ketibû.
Ji ber şer û mercên xerab ên hewayê karên lêgerînê bi zehmetî dihatin kirin.
Enqaza helîkopterê doh (piştî ketina wê 15 saetan) bi dronan hat tesbîtkirin û derket holê ku li cihê enqaza helîkopterê ti nîşaneyên jiyanê nînin.
Televîzyona dewletê ya Îranê ragihand ku kes ji qezayê bi saxîtî nefiliye.
Piştre hat ragihandin ku Serokkomarê Îranê Îbrahîm Reîsî, Wezîrê Karên Derve yê Îranê Husên Emîr Abdulahiyan, Melayê Înê yê Tewrêzê Ayetulah El Haşim û Parêzgarê Azerbeycana Rojhilat Melîk Rehmetî canê xwe ji dest daye.
Li hêla din 2 rayedarên leşkerî yên pilebilind ên Supaya Pasdaran û 3 muretebat jî di heman helîkopterê de mirine.
