Senatorê Komariyan ê Amerîkayî Lindsey Graham destnîşan kir ku rewşa Îraqê aloz e û dê ev rewş salên pêşiya me jî wiha berdewam bike.
Lindsey Graham piştî hevdîtina xwe û Serokwezîrê Îraqê Mihemed Şiya Sûdanî ya li Washingtonê bi Berpirsê Ofîsa Rûdawê ya Washington Diyar Kurde re axivî.
Lindsey Graham diyar kir ku wî û Sûdanî mijarên wekî “DAIŞ, bandora DAIŞ ya li herêmê, yekîtiya Îraq û Kurdan” nirxandine.
Lindsey Graham da zanîn ku “Vegera DAIŞê ne di berjewendiya ti kesî de ye” û berdewam kir:
“Civîna me gelekî baş bû, em li sêr rêkarên ji bo astengkirina vegera DAIŞê û li ser aramiya Îraqê axivîn.”
“Pêwendiya we ya bi Îranê re cuda ye”
Graham amaje bi êrişa Îranê ya li ser Îsraîlê jî kir û got:
“Rewşa li herêmê bandorê li Îraqê jî dike.
Ez dizanim pêwendiya we ya bi Îranê re cuda ye û ez rêzê lê digirim.
Li gorî min, di berjewendiya Amerîkayê de ye ku li Îraqê yekîtî çêbibe û ji aliyê aborî ve wekî yek welatî bi pêş bikeve.”
“Em parçebûna Îraqê naxwazin”
Lindsey Graham amaje bi pirsgirêkên Hewlêr û Bexdayê jî da û pê de çû:
“Rastî ev e, li ser parvekirina dewlemendiyên Îraqê nîqaş hene.
Em dixwazin yekîtiya Îraqê biparêzin, em parçebûna wê naxwazin.
Ev mijareke tevlîhev e û dê gelek salan jî wiha bimîne lê ez ji bo her du aliyan jî hêvîdar im.
Ez dikarim li ser Îraqê vê bibêjim: Şîe, Sunî, Kurd û Mesihî dikarin bi hev re bijîn.”
Dadgeha Bilind a Federal a Îraqê hejmara kursiyên Parlamentoya Kurdistanê kêm kiribû û kota jî rakiribû.
Lindsey Graham diyar kir ku wî dilgiraniya xwe li ser vê mijarê ji Sûdanî re gotiye.
