PKKê êrîşî Pêşmerge kir

Qaymeqamê Navçeya Amêdiyê Warşîn Selman eşkere kir, li Kanî Masê, PKKê êrîşî hêzên Pêşmerge kir û pêşmergeyek birîndar bû.

Warşîn Selman ragihand, li nahiya Kanî Masê çekdarên PKKê êrîşî hêzên Pêşmerge kir û di encamê de pêşmergeyek birîndar bû.

Li ser êrîşên çekdarên PKKê, Parêzgarê Duhokê Elî Teter daxuyaniyek belav kir û ragihand, bûye demek PKK karên îftîzazî li Herêma Kurdistanê dike.

Daxuyaniya Parêzgarê Duhokê wiha ye:

Îro danê êvarê 26ê Gulana 2022yan di encama êrîşeke PKKê de bo ser cihê seyranê yê li devera Bamernê ya li qezaya Amêdiyê mixabin du zarok şehîd bûn û zarokek jî birîndar bû.

Demek e çekdarên PKKê bi karên îftîzazî li nav Herêma Kurdistanê radibin û bizava têkdana tenahî û rewşa aram a wê dikin. Di nav çend rojên derbasbûyî de PKK ev çendîn bizav û kiryarên têkderane li Herêma Kurdistanê encam dan, weke êrîşkirina ser wêstgehên medyayê û cihên sivîl û xalên Pêşmerge û sazî û dezgehên sivîl û xizmetguzariyên Herêma Kurdistanê.

‎Em vê tevgera ne Kurdane ya PKKê bi hemû rengî protesto û şermezar dikin ku bivazê dikin şerê xwe veguhêzin nav gund û bajarên Herêmê¸û bi vî rengî şikest û feşela xwe ya leşkerî û siyasî perdepûş bikin.

‎Di encama zordariya PKKê û siyaseta wê ya çewt de nêzîkî 330 gundên parêzgeha Duhokê hatine valakirin û xelkê wan gundan zêdetirî 30 sal in ji gundên xwe bêpar mane û qurbaniyên îro jî ji wan gundan in ku di encama siyaseta PKKê de, ev zêdetirî 30 sal in gundê xwe vala kirine.