Hoşyar Zêbarî piştgiriya gotara Muqteda Sedir dike
Endamê Polîtburoya Partiya Demokrat a Kurdistanê (PDK) û Wezîrê berê yê Darayî yê Iraqê Hoşyar Zêbarî piştgirî li gotara Rêberê Tevgera Sedir Muqteda Sedir kir.
Endamê Polîtburoya Partiya Demokrat a Kurdistanê (PDK) û Wezîrê berê yê Darayî yê Iraqê Hoşyar Zêbarî piştgirî li gotara Rêberê Tevgera Sedir Muqteda Sedir kir û ragihand, çareserî vegera bo dadperwerî, yasa û nêrîna gel e.
Hoşyar Zêbarî li ser hesabê xwe yê Twitterê diyar kir: “Giliyên bêbingeh, ku ji bo ragirtina projeya hikûmeta piranî ya niştimanî ya Cotmeha 2021ê li dadgehê hatin tomarkirin, sedema derketina qeyrana siyasî, ewlehî û civakî ya li Iraqê ne.”
Zêbarî di wê baweriyê de ye ku Muqteda Sedir rast dike, çareseriya vê rewşê vegera bo bingehên dadperwerî, yasa û nêrîna gel e.
Rêberê Tevgera Sedir Muqteda Sedir îşev peyamek arasteyî alîgirên xwe û aliyên siyasî yên Iraqê kir û got, tiştê niha rûdide, milmilaniya li ser desthilatê ye û wî hîn biryar nedaye ku beşdariyê di hilbijartinên bê de bike an na.
Nûvekirina herî dawî: 02:20:46
