Siyaset li bakurê Kurdistanê

Heger me re ji roja pêşî de tedbîrên xwe negire, roj tê hebûnên mirov, destketiyên me re jî têk diharin. Loma dibêjim ku rewşa niha li bakurê kurdistanê, partî û rêxistinên me ketinê, çi rewş û halî de ne, min xwest vê binivîsînim.

Min xwest vê rewşa wan bi mînakek ji swêdê de vekim: Li swêdê jî weke hemî welatan, kesên têne girtin û ceza li wan têne birîn, davêjin girtîgehê. Dema suçê wî/ê hindik dibîmîne wî/ê dişîne mal. Dişîne mal lê weke qeydeke., weke bazinekî mezin bi nigê wî/ê ango li jora gîzokê de girêdide. Ew qeyd ji bona ew tenê bikaribe li hundir mala xwe û heta li hewşê jî bigere. Heger zêde çû li ba polîsan larm (alarim) lê dide ku ew kes ji hûdûdê xwe derbas bû ye. Wekî din polîs êdî karê xwe dikin.

Niha li bakurê kurdistanê jî rewş ev e, kîjan partî şexs û dezgeha çenekî, hedê wê qanûna hatiye danîn derbas bike têne girtin. Ev rewş roj bi roj zêde bûye ku niha camêrên me, siyasetmedarên me li tirkiyê û bakurê kurdistanê bi wê qeydê dijîn.

Em ew kesên din ku vê rewşê nizanin ya jî baş analîz nakin, karê me jî tim dimîne rexnekirina partiyên heyî. Helbet ev heqê me ye. Lê divê êdî em jî rewşê fêm bikin.

Min carekê zû de nivîsî bû ku berî 12 îlona 1980 di nava hemî rêxistinên me de dihat zanîn û gotin ku dengê potînên leşkeran tê. Her çiqasî hemiyan dizanîbûn wê feleket jî bibe, lê dîsa li gor wê tedbîrên xwe negirtin.

Dîsa carekê min ji bona rewşa niha (salek berê) nivîsî bû, heger partî û rêxistinên me ji niha de tedbîrên xwe negirin wê ew feleka 12 îlona1980 bi serê wan de jî bê.

Her çiqasî min û gelekan got û nivîsî jî, lê bawer nakim ku tu rêxistinekê, partiyekê ev cidî girt û li ser rawestiya ku gelo ev çi dibêjin. Çi kirin?

Eynen niha jî weke berî 12 îlonê kirin. Berî 12 îlonê çi hate kirin? Ji ber ku rewşa siyasetê roj bi roj geş dibû, her roj hin maf û heq bi dest diket, li gelek bajar û bajarokan şoreşger bû bûn desthilatên wir. Û vê rewşa weha kiribû ku êdî partî, rêxistin, kes û kesayetiyên me dengê potînên leşkeran nedibîhistin. Tenê bi xwe û hêzbûn ango bi firehbûna partiya xwe dibiliyan.

Niha çi dibe? Li gor min niha ji rewşa dubare dibe û ji dema berî 12 îlonê xerabtir e. Çima? Ji ber ku siyasetmedarên me mixabin dîsa nikarin paşaroja xwe bifikirin û wê bibînin ku wê çi bê serê wan. Loma eynen weke berî 12 îlonê, niha herkes bi xwe biliyan in. Bi xwe ketina û xwe bi xwe karê xwe dikin da ku partiyeke ji ya din bi hêztir biafirînin.

Dema reqabeta partiyên me ne li hember dijmin, lê li hember hev be, dijmin him kêf dikin him jî dizanin ku wê çi bîne serê wan.

Piraniya me û hemî rêxistinên me ji rewşa niha ne xweş hal in. Ev rewş her ku diçe berbi xerabiyê ve dihare. Êdî siyasetmedarên kurd hema tiştekî bêjin têne girtin û diavêjin girtîgehê.

Desthilat ango hukumeta niha li siyasetmedarên me weha kirî ye ku hema ew gotineke li dij wê qanûna ji bona parastina desthilatê hatiye danîn bikin, yek ser têne girtin. Ez bawerim wê hê xerabtir jî bibe.

Her weha roj bi roj siyaset li bakurê kurdistanê tengtir dibe. Ji ber ku êdî sîxuran, mît û ajanan di nava kurdan de zêde dikin ku wana ji kê nexweş bin wan îxbar dikin û wana têne girtin. Ev çi tîne?

Ev wê tîne ku êdî siyasetkirin li bakur kurdistanê dibe perçeyek ji êgir. Êdî weha dibe ku tu nema dikare behsa hêjayî û delaliya karê siyasî li bakurê Kurdistanê bike û bêje. Netîce????

Heger hê jî partî û rêxistinên me ev rewş fêm nekiribin û hêjî dixwazin bi tena serê xwe karê siyasî li bakurê kurdistanê bikin û hêjî fêr nebû bin ku êdî pêwîstiya yek dengî li bakurê kurdistanê heye, aqûbeta wan jî dê weke dema 12 îlona 1980ê be.

Ji niha de ew destketinên hene roj bi roj kêmtir dibe, ji destê kurdan dihare, pêwîst e berî ku dem derbas bibe, divê hemî partî, rêxistin, kes û kesayetiyên kurdan dest bidin hev û eniyeke neteweyî damezrînin. Ya na taliya wan û ya bakurê kurdistanê dê gelekî xerab bibe. Li gor min jî wê sûçdarê vê tenê bibe partî û rêxistinên heyî.

Partiyên me yên kurd û kurdistanî li bakurê kurdistanê hûn hemî hêjane, delal in, çalak û xebatkarin. Lê vana hemî dibe qurbana fikra şexsî, rêxistinî, partî û hizbayetî. Carekê xwe ji vê xilas bikin, binêrin û bibînin bê wê li bakurê kurdistan siyaset çawa bi rêve here…

Bi hêviya sala nû bibe serxwebûna başûrê kurdistanê û yek hêziya bakurê kurdistanê di bin sîwaneke neteweyî de…