Dagirkerên me niha di nava lîstikek nû de ne!!!

Bi qasî dixwînim, dişopînim û dizanim,niha dagirker di nava haziriyek û çalakiyên mezin de ku bi rêya ola îslamê ango bi rêya mislmantiyê doza kurd û kurdistanê têk bibin. Divê kurd di vî warî de şiyar bin.

Ji ber ku niha gelek ji misilman û oldarên kurd jî ketine nava wê çalakiyê û mesele xwe ya neteweyî dayê paş. Rêxisin û partiyên me, rewşenbîr û ronakbîrên me, nivîskar û welatparêzin me, bi gelemperî di vê mijarê de bê deng in. Ketina rewşa ”bila marê bi min venede hezar salî bijî”.

Lê fêm nakin û nizanin ku wê rojekê ew mar bi wan jî vede. Heger tu ji niha de nebe xwediyê xwe û li hember vê rewşa nû ku dagirkerên me li ser navê misilmantiyê kurdan dixapînin û wan dikin dijminê gelê wan, ne şiyar bî, sibê tê nikaribe tiştekî bike.

Helbet baweriya olî û bi karaîna wê du tiştên ji hev cûda ne. Divê mirov bizanibe ku li vê cîhanê her mirov, civat û qewm ji olekê ji dînekî bawer in. Lewra divê mirov ji baweriya herkesan re hurmet bigire.

Hurmet girtin heta ku ew ol ango dîn li dij neteweya te dernekeve, hebûnên te, weke tu bawer dike qebûl bike û bi darê zorê bi hukmê kuştinê ya xwe bi te neda qenûlkirinê, divê hurmeta wê bê girtin.

Ji ber ku baweriya olî tiştekî weha ku tu nikare, li gor dîtina xwe, li gor bawriya xwe bi oldaran re bikeve munaqeşeyê. Ji bona wan bihuşt û 70 horî girîng û ji bona xwe bighêjînin wê ji bona wan her tişt mubah e. Ango rast û durust e.

Lewra jî dema em li dîroka xwe, li dîroka gelê xwe dinêrin em dibînin ku dagirkerên me ji bona me kurdan weke kole û xulamên xwe bihêlin her car, her gav û her tim ol bi karanîne. Bi rêya vê olê Kurdistan wêran û gelê me jî qir kirine.

Her çiqasî demekê ev kar dane sosyalîzmê û xwestin bi rêya wê fikrê, wê îdeoliyê jî kurdan bindest bihêlin û bikin xulamên xwe. Lê sosyalîzm di demeke dirêj de bi serneketin û ew sazîman têk çû.

Ji ber vêye ku niha dagirkerên me dîsa dest avêtin ola îslamê û li ser navê wê dixwazin ji nû de bikevin nava çalakiyên tunekirina kurdan û wêrankirina welatên wan.

Daxwaz û helwest divê ew be ku kurdên misilman û oldarên dînê îslamê vê bizanibin û fêm bikin ku tim dagirkerên me ol ji bona hedef û armancên xwe bi kar anîne.

Niha dîsa ketine nava tevgera bi rêya îslamê ango olî kurdan bikin dijminên hev, ji bona kurdistaneke azad û serbixwe pêk neyê wê olê bi kar bînin, tînin û anîne.

Bawerî tiştekî xwe zayî ye, kî/ê ji çi bawer bike ew heqê wî/ê ye. Lê ne heqê tu kesan e ku baweriya xwe ji bona têkbirina kurdan û nebiserketina wan bi karbîne.

Niha dagirkerên me tiştên dixwazin bikin ev e. Yanî bi rêya olî li ser navê îslamê kurdan û berjewendiyên wan tune bikin.

Dema em vê dibêjin; Ji ber vê sedemê ye. Ya na kî kîjan olê, dînî diparêzin bi kêfa xwe ne. Divê oldarên me vê fêm bikin ku di destê Erdogan, Mollayên Îranê û Esad de tim qurana pîroz heye, wê rê xelkê didin û li gor hin ayet an suretên wê qirkirina gelê me dikin. Enfal yek ji wan e. Herroj bi darvekirina kurdan li Iran jî yek ji wan e…

Bala xwe bidinê tim meş û xwe pêşandanên ji bona Kudusê li bajarê kurdan li Diyarbekirê pêk tînin û bi sed hezaran kurdan beşdarî nava vê dikin. Ji bona Kurdusê qirik û gewriyê li xwe perçe dikin. Lê ji bona kuştin û wêrankirina kurdan û kurdistanê dengekî bi tenê jî kurdên oldar dernakev e. Ji xwe ez behsa yên dagirkeran nakim.

Lê ji bona wêrankirina welatê, xwe ji bona kuştin û qetilkirina brayê xwe deng ji yek misilmanê ji dînê îslamê bawere dernekev e.Bi serde jî dewletên dostaniya kurdan dikin, dixwazin wan bikin dijminê gelê me.

Dema rewş ev be,divê tu bizanibe ku dagirkerên me li ser karên ku bi vê rêyê kurdan berra ber hev bidin. Ew dibînin ku Kurdistaneke serbixwe li ser rê ye. Ew bixwazin, nexwazin jî dê ev ê bibe. Ji bona ev nebe jî çi ji wan tê kirine û wê bikin.

Daxwaza min ev e ku em kurd hemî li gel hev bi awayek maqûl, bê ku em dijminatiya hev bikin, di vî warî de şiyar bikin. Kî/ê li ser kîjan olê ango dînî bin, divê em hevdu weha qebûl bikin.

Ji birayê xwe yên misilman re dibêjim; niha xetereke mezin li pêş me ye. Dagirkerên me bi hemî hêza xwe û bi rêya olî dixwazin li hember berjewendiyên kurdan rawestin. Heger em bi hevre di vî warî de şiyar bin em ê bi hevre welatê xwe û serxwebûna başûrê kurdistanê biparêzin.

Ji ber ku heta kurd nebin dewlet wê her kolê xelkê bin. Ji bona em ji koletiyê xilas bibin, li ser me her kurdekî ferze ku ji bona başûrê kurdistanê bibe dewleteke kurdî ya serbixwe divê em li hember lîstkên dagirkeran şiyar bin.