Divê HAK-PAR çi bike?

HAK-PAR kongreya xwe ya 9.em bi serketî pêk anî û serokekî hê pore wî spî nebûye, brêz Düzgün Kaplan hilbijart. Ev ji bona pêvejoyeke nû girîng e. Girîng dibêjim, ji ber ku divê êdî em weke şexs, rewşenbîr û partiyên siyasî rastiya ku îro bakurê Kurdistanê tê de ye bibînin.

Lê helbet dîtin têr nake, li gor dîtineke rast, divê hewldan jî pêk bên. Em hemî baş dizanin û dibînin ku îro rewş çi ye û berbi ku de dihare.

Ez zêde dirêj nekim û ji bona gavavêtina HAK-PARê ya hin şaşî rastkirinê û gav avêtinên rast, divê çi bike ez ê weke zanîn û têgihiştina xwe bi çend xalan vebêjim.

Ez dîsa kongreya wê ya 9an pîroz dikim. Ji komîta nû û serokê hêja û ciwan birêz Düzgün Kaplan re serketin dixwazim û dive em her yek ji aliyê xwe de ji wî re bibin alîkar da ku ew jî bikaribe karê xwe baş pêk bîne.

Di karê siyasî de kollektifî divê, biryardayîn bi erêkirina piraniyê tê qebûlkirin û piştî wê jî divê bikeve jiyanê da ku baweriyê bide gel û dijberên xwe.

HAK-PAR ji pêvejoyeke dirêj tê. Bi ketin û rabûna xwe, karê xwe ê siyasî heta niha meşandiye. Helbet her kar li gor herkesan nabe. Tim jî hin li gel û hinên jî li dij dê hebin.

Divê HAK-PAR çi bike da ku bikaribe bibe altarnatifa gelê xwe?

Em baş dizann ku li bakurê kurdistanê nebûye adet ku siyasetmedar, serok û rêvebirên partyên me yên siyasî, rewşenbîrên xwe, nivîskar û ronakbîrên xwe guhdarî bikin û nivîsên wan jî bixwînin.

Lê ji bona azadî û serxwebûna welatekî kolonî weke Kurdistanê rol û erkê wan camêrana gelek e. Loma divê êdî HAK-PAR jî weke berê û weke partiyên heyî neke. Divê ew bi aqilmendî, zelelî û bi sebir nivîsên nivîskar û rewşenbîrên xwe bixwîne, li ser wan raweste û pêşniyarên wan di meclîsa xwe de bide munaqeşekirinê. Piraniyê got erê, heta ji we hat wê di jiyana rojane de pêk bînin.

Divê HAK-PAR êdî li hember rexneyên ji wan re tê, bînfireh be. Lê heger rexne jî rexne be. Guhdarî bikin û bixwînin bê ka ew nivîskar û rewşenbîr çi ji we dixwazî. Heger daxwazên wî/ê maqûl be heta ji we bê, wê pêk bînin.

Ji bona HAK-PAR bibe dengê gelê xwe, li gor şert û mercên xwe bi kêmanî divê salê 2 civînan li gel rewşenbîr û nivîskarên xwe pêk bîne. Lê divê ne tenê alîgir û terefdarên we bin. Fireh bigirin yên dijberî we jî bila hebin.

Divê HAK-PAR li gor qawet û şertên xwe salê carekê nivîskarê kurd ku berhemên kurdî nivîsandine xelat bikin. Ev xelat wê bibe hewldana bêtir berhem nivîsandinê û xwedî lê derketandina nivîskar û rewşenbîrên xwe.

HAK-PAR divê xwe weke partiyeke desthilat bibîne û li gor wê jî xwe bi rêz û organize bike. Bi mesele û rexneyên herkesan yên ne hêja re serê xwe neêşîne.

Divê HAK-PAR di destpêka her karekî ku ji bona çareseriyê pêk bîne, divê wê berê di meclîsa xwe de bide munaqeşekirinê û li gor biryara ji wir derkeve, bike hewldana çareseriyê.

Heta ku ji HAK-PARê bê divê êdî xwe ji nava çar dîwaran derxe, bikeve nava xelkê xwe. Dema xelkê wê jî ew li kolanên bajar û bajarokan dît, dê bêtir baweriyê pêk bînin û nêzîkayî yê bidinê.

Divê HAK-PAR aboriya xwe xurt û mediya xwe jî fireh bike. Heta ku jê bê giraniyê bide kesên dijberî xwe û nivîskarên gelê xwe, yên ji doza welatê xwe bawerin.

Nivîskar û rewşenbîr jî, wê bi nivîs û dîtinên xwe ji we re bibin alîkar. Rê bidin dijberên xwe jî bila we rexne bike. Hûnê wê gave bêtir li kêmaniyên xwe hay bibin da ku wan çareser bike.

Serok temsîlkarê partiyê ye lê divê ne her tişt be.Hurmeta wî bigirin lê tucaran nebin mirîd. Divê hûn bi çandeke nû ku her endam jî bikaribin rêvebir û serokê xwe bi awayekî demokratîk rexne bikin pêk bînin. Tu carî rê nedin serok hertişte û çi bêje ew e, ango ya rast gotina wî ye.

Ji bona HAK-PARek bibe ya gel divê gelê xwe guhdarî bike û bide diyarkirin ku ew ji bona azadiya gel li kolana siyasetê ye.

Mezinên gelê xwe bi bîr bînin, yên li jiyanêne qîmetê bidinê û wan guhdarî bikin, pêşniyar û têbiniyên wan bigirin li gor destûr û bernameya xwe tevbigerin.

Her pêşniyar û rexneyeke ji we re hat, wan di meclîsa xwe de guftogo bikin, sedema wan fêr bibin û rêya çareseriyê ji meclîsa xwe bi dengê piraniyê derxin. Divê her endamek li gor serê xwe bersîva heman tiştan nedin.

Ji bona nivîs zêde dirêj nebe, ez li vir diqedînim û ez ê car carna bi rexne û dîtinên xwe li gel we bim an li dij we bin. Dijberî ne dijminatiye. Li gor min rêya pêşketinê û kêmaniyê xwe dîtinê ye.

Em ê guhdarî bikin, bibînin ka bê di vê dema hesas de wê HAK-PAR çi bide gelê xwe.

Her çalak, serketî û berketî bin…

Bu makalede yer alan fikirler yazara aittir ve Nerina Azad'ın editöryal politikasını yansıtmayabilir.