Di hilbijartina herêmî de helwesta partiyên me divê çi be?

Ez êdî bi xwe gihiştim wê baweriyê ku tu derd, êş û merama partiyên me yên bakurê kurdistanê ji bona weke hêzek neteweyî ya kurd û Kurdistaniyan bi serkeve tune ye..

Tuneye dibêjim û dibe ku ev hinekî giran jî be, lê dîsa dibêjim tune ye. Heger heba wê van partiyên me li gel hev bi hevre helwesteke neteweyî danîna.

Ev zêdeyê çel salan ku hin ji van partiyên me qaşo karên ji bona kurd û kurdistanê dikin, nivîs û gotinên wan di vê derbarê de ye. Lê kiryarên wan, daxwazên wan yên pratîk ji vê dûr e.

Ji bona me kurdan ya girîng ew e ku kî çi dike ye. Ne ku kî çi dibêje. Gotin êdî têra gelê me nake. Ji ber ku rewşa îro ji gotinê derbas bûye.

Bi rastî jî partiyên me yên bakurê kurdistanê neteweyî bûna wê helwest, kiryar û bûyerên wan jî hemî li ser vê xetê pêk bihatana. Lê…

Lê em dibînin, dixwînin û dibihîzên ku van partiyên me xwe û hevalbendên xwe ji bona berjewendiyên partî û şexsan diwestînin û bi salan e ku ji ber vê helwesta wan ya şaş bi sernakevin.

Di her hilbijartineke ku li tirkiyê û li bakurê kurdistanê de partiyên me jî dixwazin xwe rê bidin, çend civîn û hevkariyên ne li ser asasê neteweyî bi hevre dikin, lê hemî jî bê encam dimîne.

Di nava ewqas zehmetiyan de karên dikin yek jî encama xwe tune ye. Karê bê encam jî weke dara bê fêkî ye. Ya rastî xwe, hevalbendên xwe, nas û dostên xwe jî gelekî diwestînin, bi pereyekê zêde mesrefeke bê fêde dikin.

Em dibêjin û dinivîsînin lê tu fêda wê tune ye. Ji ber ku partiyên me nivîskar û rewşenbîrên xwe guhdarî nakin , ew hê jî tenha hevalbendên xwe guhdarî dikin. Ji bona wan hevalbendekî wan çiqasî xerab jî be, ji kesekî zana jîr û têgihiştî ku ne hevalê wan e, baştir û bi qîmetir e.

Ev yeka jî ji me re dide zanîn ku partiyên me hê ji xeta neteweyî dûr û nêzîkî xeta partiyên xwe ne. Ji neteweyî bêtir şexsî difikirin.

Lê em vê jî baş dizanin ku heta parityeke neteweyî nefikire, biryar, kiryar û helwesta wê ne neteweyî be ew ê jî bi sernekeve. Ka binêrin hin partî zêde yî çel salan e qaşo karê kurdewarî dikin, lê di van salan de heta niha ji bona kurdan tu destkevtin bi ser nexistine.

Ez meselê dirêj nekim û vegerim mijara xwe ya ku wê di sala 2019an de hilbijartina şaredariyan li tirkî û bakurê kurdistanê pêk bê. Di vir de divê helwesta partiyên me dê çi be û divê çi bikin?

Ez bi xwe ne bawerim ku wê tu helwesteke neteweyî bi hevre bigirin, lê dîsa ez ê nerîn û pêşniyara xwe bêjim:

Yekem divê hemî an piraniyan parityên me zûtirîn demê hevkariyeke xurt an eniyekê neteweyî damezrînin. Di xebateke weha de divê xwe ji HDP dûr bigirin…

Piştî vê jî divê ew li kesên jîr, zana û kêrhatî bigerin wan bibînin û bikin namzetê şaredariyan. Ne ku dîsa tenê li hevalbendên xwe bigerin û wan bikin namzet. Helbet ev jî heqê wan e, lê bi salan e ev helwest bi serneketiye loma divê vê biguherin.

Dudo; li kîjan bajarî dixwazin namzetên xwe dînin, dibê li ser kesayetekî/e weha rawestin ku ew ji wî bajarî be û ji alî piraniya xelkê wir ve bê nasîn zanîn û hezkirin.

Sisê; heger partiyên me dixwazin vê carê fêkiyê wê dara ku wan bi salan çandine bixwin, divê vê bikin da ku êdî xelk jî baweriya xwe bi wan bîne.

Gotina min talî jî ev e: Heger partiyên me dixwazin bibin dengê gelê xwe, bibin nûnerê welatê xwe, bibin hebûna mirovên xwe, divê li bajarê Diyarbekirê Mehdî Zana yê ku gelek bedel daye û xwedî tecrubeya şaradariyê ye bikin namzetên xwe.

Çima Mehdî Zana?

Ji ber ku camêr gelek bedel daye, gelek tade û êşkence dîtiye, desthilatiya tirkan û hevalbendên dagirkeran yên kurd jî, ji wî hez nakin û wî naxwazin. Loma divê partiyên me jî wî bikin namzet û ji bona bi serketina wî kar û xebatê bikin.

Heger di kar û xebateke weha de brêz Mehdî Zana bi ser ket ev ê bibe serketina wan partî û rêxisitnên me yên ew kirin namzet û piştgirya wî kirine.

Armanca partiyên me divê bi rêvebiriya wan serketina gelê me be. Serketineke weha dibe ya wan bi xwe û evê êdî bibe adet.

Heger li her bajarekî namzetekî/ê ku xelkê wir jê hez dikin destnîşan bikin, ev ê bibe serketineke giştî ya gel û wan partiyên me.

Rastî agir e, loma kes newêrin zû bi zû xwe nêzîkî wî agirî bikin. Lê Bûbê Eser bi salan e di nava vî agirî de dişewite…