Ev destpêkek e ji bona PK(K)!!!

Loma jî her destpêkek dawî anîna wê heye. Îcar ew dawî anîn dê çawa be, bi çi reng û awayî bimeşe girêdayî civakê ye.

Dîsa em bûne şahîdê wê yekê ku hilweşandina sazûmana dîktatoran ji nava xwe de dest pê dike û dawî lê hatiye û tê. Baweriya min ew e ku wê dawî anîna pk(k)ê jî weha be. Loma min got ev destpêkek e…

Dîktatorî ne heta hetanî ye. Roja wan jî tê û weke tu noka li kevir xe, perçe perçe dibe. Ew perçebûn bi xwe re nûjeniyekê û yekîtiyeke xurt, li ser hîmê parastin û azadiya welêt tîne.

Her weha her partî û rêxistina diktator jî ne heta hetanî ye. Ew piranî bi destê serdestên xwediyê xwe têne damezrandin da ku li gor berjewendiya wan kar û xebatê bike. Heta niha pk(k) jî ew kirî ye.

Li gor vê jî dagirkerên me tim lê xebitîne da ku hêz û qaweteke xurt ya kurdan çênebe. Ji bona vê jî tim kar kirine û di gelek waran de bi ser jî ketine. Lê weke me got her tişt tu caran ne heta heta nî ye.

Dema dagirkeran dîtîn ku tevgera welatparêzan li bakur Kurdistanê roj bi roj xurt dibe, bi hêz dibe û dibe xwedî qaweteke bê hempa. Aha wê demê, ew ji nû de difikirin û fikirîn ku çawa vê têk bibin.

Lewra jî ev nehat hesabê dagirkerên tirk weke bav û kalên xwe kirin û rêxistinekê ji kurdan û li ser navê wan damezrandin da ku bi rêya wê pêşî li tevgera azadîwaz bigirin. Her weha jî kirin û di gelek waran de bi ser jî ketin.

Loma di wê kela kela germa tevgerên welatparêz geş û xurt dibibûn (1960-80). Karbidestên tirkan jî di nava wê kele kelê de pk(k) damezrandin, da ku wê pêla welatparêz bişkênîne. Her weha jî bû. Lê ne bi gelemperî.

Me gelek caran ev mijar nivîsî ye û gotiye. Loma hewce nake em dîsa li tiştên berê vegerin. Loma min xwest bêjim ku ji pk(k) veqetandina berpirsê gewre Özgür Jiyanda Li gor min destpêka hilweşandin û dawî anîna pk(k) yê.

Heta niha ne di nava pk(k) de û ne jî ji dervî wan çiqasî kar û xebat hatibe kirin jî me nikarî bû, wê hilweşînin û rûçikê wê ya rast ku xizmetkarê dagirkerane derxin holê.

Ji ber ku di dema şer û pevçûnan de tu nikare rastiyê bêje, te got jî nayê dîtin û xwendin. Lewra ew rastiya di nava gulleyên ji bona tunekirina kurdan dihat teqandinê de, zehmet bû ku tu rastiyê bi nezanan bide zanîn û qebûlkirin.

Nezan dibêjim, ji ber ku hin îstîsna ne têde bêtirîn tevgerên dîktator ji kesên nezan, berjewendîparast xêrnexwazên gelê xwe têne peyde kirin ango amade kirin…

Tirkan rewşa xurtbûna tevgera Kurd li bakurê Kurdistanê baş fêmkiribûn loma wan vê zanebûna xwe, ji bona rêxistina xwe ya bi navê pk(k) baş bi kar anîn. Nehiştin û mecal nedan endamên pk(k) da ku bikaribin bifikirin û rastiyê bibînin.

Lê çi dibe bila bibe, dawî anîna dewlet, partî û kesên xwedî qawet û yên dîktator jî bi destpêka ji hevketina di nava xwe de dest pê dike.

Îro em pir bi rehetî dikarin êdî vê di nava pk(k) de jî bibînin. Loma veqetandin û eşkere kirina bûyer û kiryarên pk(k) êdî têne qebûlkirin û dîtin.

Ji ber vê ez dibêjim; veqetandina Özgür Jiyanda ji pk(k) wê bibe destpêkek da ku êdî em ê bibînin bê wê çawa ev rêxistina dîktator û ya li ser destê dagirkeran, ji bona tunekirina Kurdan hatibû damezrandinê, têk here.

Êdî dawiya pk(k) tê dîtin. Ji ber ku hilweşandina avahiyekê bi kişandina kevirekî ji asasê wê de despê dibe. Êdî pk(k) tu şerê bike nemaye. Ya wê êrîşî başûrê kurdistanê bike û pêşmêrgeyên qehreman bikujin ya wê ji nûde li kuştina nava xwe de vegere û destpê bike.

Ji bona zarokên me yên di nava pk(k) de neyên kuştin, divê malbatên zarokên wan gerîllana, pêwîst e dest bi xwepêşandanan bikin, semîner û konferansan li dar bixin da ku bikaribin zarokên xwe ji nava wî aşê kurdan dihêre, xilas bikin.

Divê ew gerîlayên durust ku ji bona azadiya miletê xwe tevlî wê rêxistina kurd kujê bû bûn, mecal dîtin jê birevin û bikevin nava hêza pêşmêrgeyan. Heger vê nekin wê gelek ji wan bêne kuştin. Taliya talî jî wê wanên li qandilê (Tirkiye û Iran) rûniştine bi operasyonekê dê herin tirkiyê ba xwedî û xalanên xwe.

Divê medya kurdî bi gelemperî weke kampanyekê dest bi eşkerekirina kiryar, bûyer û xerabûnên pk(k) ji xelkê re eşkere bikin.

Di vê derheqê de arşîveke mezin di destê partî û rêvebirên başûrê Kurdistanê de heye divê ew jî êdî destpê bikin wana ji raya giştî re eşkere bikin da ku gerîla û xelk jî êdî rastiyê bi çavên xwe bibînin û bi guhên xwe bibihîzin...

Li gor min ji pk(k) veqetandina Özgür Jiyanda destpêka hilweşandina wê bi xwe ye. Em ê guhdar bin û bişopînin…