Piştî ba û bahozê aramî ye

Weke tê zanîn ku li vê cîhanê divê ji sed salan carekê hin guherandin pêk bê da ku cih û bazara dewletên mezin jî firehtir bibe.

Tê zanîn ku di şerê cîhanê ê yekê û dudan de cihan sero binê hev bû. Guherandin û avakirina gelek dewletên nû pêk hat. Van guherandinana hemî jî ji bona berjewendiya dewletên mezin ku li hev kiribûn, pêk hatibû,

Ji bona hin guherandin bibe, divê berê tevli hevî, ne aramî şer û pevçû derkeve. Derkeve da ku însan êdî ji ne aramiyê aciz bibe. Pişt re jî bi mudaxweleya dewletên mezin, şer disekine, aşitî pêk tê û di nav vê de hin dewlet perçe dibe û ji nava wan hin dewletên nû derdikeve.

Ji bona dewletên mezin bikaribin wan guherandinana li gor dilê xwe pêk bînin, divê berê tevliheviyî derxin û dûre jî xwe weke aşitixwaz rê bidin, guherandinên xwe dikin û ji nûde aramî, aşitiyê pêk tînin.

Hin ji van guherandinan li Balkanan dest pêkiribûn û wir weke xwe kirin. Piştre bi bihara ereban berdewam kirin. Ji ber vê niha jî ji bona rojhilata navîn jî bikin weke xwe û dewletên bi hêz û xwedî qawet nehêlin, li wir çi kirin û dikin em hemî dizanin û dibînin.

Bi derxistina El-kaîde, Daîşê ûhwd xwestin ku li rojhilata navên heroj xwîn birije û çi demê xelkê wir ji xwînrijandinê of û aciz bûn aha dê wê demê jî bixwazin aşitiyê bînin.

Helbet anîna aşitiyê jî wê bi perçekirina hin dewletên mezin û derxistina hin dewletên nû ve pêk bê. Loma jî em dibînin û dizanin ku di nava vê guherandina nû de wê Kurdistaneke serbixwe jî derkev e.

Vê ne ji bona xatirê çavên kurdan dikin. Berjewendiyên dewletên mezin weha dixwaze loma vê dikin û ev li gor berjewendiya gelê me ye jî. Divê kurd vê ji bîr nekin ku îro her tişt berjewendiye…

Divê kurd jî êdî vê yekê fêr bibin ku herkesên li vê cîhanê li gor berjewendiya xwe tevdigerin. Dema em kurd jî vê bikin em ê jî bi serkevin. Biryara avakirina dewleteke kurdî hatiye dayîn loma divê êdî kurd netirse û bizanibe ku wê kurdistana serbixwe bê ragihandinê.

Me bi salan rojên reş û nexweş dît û derbas kir. Bi salan e em kurd weke koleyan ji dagirkerên xwe re xizmetê dikin. Lê êdî roja me jî nêzîk bûye, herî dereng heta du salan em jî dibin xwedî dewleta xwe ya serbixwe. Piştî vê jî êdî wê reş û spî ji hev bê veqetandin.

Ji ber vê ez dibêjim; divê kurd ji her guherandineke wê bibe, hazir û amade bin. Tiştên baş li gor dilê me dê pêk bê. Em ji koletî û bindestiyê xilas dibin. Hindik maye ku roja me jî hilê.

Dema roj li me hilat divê em jî weke xelkê vê cîhanê, weke miletê kurd li ser erda xwe bi azadî bijîn. Ev heqê me ye. Lê…

Lê divê em, desthilata me kurdan, hukumet û dezgehên me, wan kesên ku ji bona Kurdistaneke serbixwe neyê ragihandin, çawa li ba dijmin kar dikirin. Çawa ji bona berjewendiyên malbata xwe welat difrotin dagirkeran jî divê neyê ji bîr kirin.

Heger ne ji wan kes û partiyan welatfiroşbana, di bû ku Kurdistana serbixwe zûde hatiba ragîhandin. Van welatfiroşan bi xebatên xwe yên li gel dagirkeran ev dereng xistin.

Lewra jî dem dama ku hemî kurd ji bona Kurdistana serbixwe kar bikin e. Em hemî dizanin ku heta em nebin xwedî dewlet em ê li her çar perçan tim kolebin.

Azadî û serbixweyî xweş e, loma divê em kurd jî êdî di nava vê xweşiyê de bijîn. Ev jî mafekî me ê rewa ye. Me weke kurd heta niha erdê tu kesan dagirnekirî ye, welatê wan perçe nekiriye. Em dixwazin welatê xwe ji bin dagirkeriyê azad bikin û li ser erda xwe bijîn û gelê xwe bide jiyandinê.

Di nava vê tevliyeviya niha ku li rojhilata navîn de destpêkirî ye, di nava vê şevreşa heyî de Kurdistana serbixwe dê weke rojê hilê û wê şevreşa me hemî kurdan ronî bike. Bila ji nihade Kurdistana serbixwe li kurdan pîroz be.