Giringî û pêwîstiya referandûmê

Em Kurd ji roja perçebûna (1639) welatê xwe yê şêrîn, Kurdistana delal û heta ku em bigihêjin azadî û serxwebûna xwe em ê her ber xwe bidin, têbikoşin da ku em mafê xwe bistînin.

Piştî gelek serîhildan, berxwedan û wendakirina şerê azadiya Kurdistanê, demeke dûr û dirêj Kurd ketibûn nava bêdengiyeke bêbinî. Lê ji bona ev bêdengiya qidûmşikestî ji ser kurdan rabe her Barzaniyê nemir li gel pêşmergeyên xwe di nava tevger û danûstendinê de bû.

Tekoşîn û berxwedana Kurdan ya herî talî ku têkçûyî Komara Kurd li Mahabadê bû. Piştî vê têkçûnê, li her çar perçayên kurdistanê bêdnegiya mêrinê girtibû ser Kurdan. Vê him moral, him qidûmê kurdan şikestandibû. Vê bêqidûmiyê kiribû ku êdî Kurdan newêrîbû dengê xwe derxistana. Bi hal û bendestiya xwe yan bi darê zorê razî bûbûn yan jî mecbûr mabûn vê qebûl bikin.

Lê Barzaniyê nemir ji vî halî ne kêfxweş û ne rehet bû. Plan û proje çê dikir da ku vê bêdengiyê ji ser Kurdan rake û weha jî kir.

Bi gulleya ewil ya îlona 1961 ew bêdengî, ew qidûmkşestî, ew bêmoralî ji ser Kurdan rabû. Vê gulleyê kir ku Kurd ji nû de zîndî bûn, bawerî bi xwe anîn ku divê ew heta ku azad bibe şerê azadiya gelê xwe bidin.

Bi saya şoreşa îlonê û berdewamiya wê ya gulana 1976an û serîrakirina 1991an Kurd piştî demeke dûr û dirêj ji nû de gihişt hin mafên xwe yê rewa…

Êdî serkêşî, pêşevanî û serokatî ketibû destê birêz Mesud Barzanî û ew jî li ser rê û rêbaza bavê xwe, Barzaniyê nemir, meşiya. Ji ber ku wî perwerdehiya xwe ji bavê xwe girtibû ew li ser wê rêbaza pîroz a Barzanî meşiya û dimeşe.

Ew rêbaz bû ku Kurd li Başûrê Kurdistanê di sala 1992’an kir xwedî otonomî . Dû re ew kir Federalî û niha jî gav bi gav berbi serxwebûnê ve diherin.

Her miletek qerzdarê hin rêber û serokên xwe ne. Loma Kurdên me yên her çar parçeyan jî niha qerzdarê Barzaniyê nemir e ku wî bi gulleya îlona 1958 him bêdengiya Kurdan şikand, him jî ew bû sedem ku îro em kurd li Başûrê Kurdistanê xwedî welatê xwe yê azad û di demeke nêz de jî em ê bibin xwedî dewleta xwe ya serbixwe.

Gelo dewleta serbixwe wê çi bide me Kurdan?

Kurdistaneke serbixwe; wê ruhiyeta Kurdî di mejiyê Kurdan û Kurdistaniyan de ji nû de bi cih bike da ku Kurd xwedî li welatê xwe derkevin.

Kurdistaneke serbixwe; wê wî mejiyê Kurdan ku hema hema tu nemaye ji Kurdbûnê dûr û ji Kurdistanê birevin li wan vegerîne. Wê ev Kurdistana serbixwe ji nû de hin Kurdan bike Kurd da ku welatê xwe biparêzin berjwendiya welatê xwe di ser her tiştekî re bigirin.

Kurdistaneke serbixwe wê Kurdan bide nasîn, kî dost û kî dijmin e. Wê bide zanîn ku di welatê xwe yê azad de jiyandin çi ye, wê çi tamê û hêjayiyê bide.

Kurdistaneke serbixwe wê Kurdên ku di qada navneteweyî de mirîne, zindî bike. Wê êdî li seranserê cîhanê Kurd bêne nasîn û zanîn ku ew kî ne, neviyên kê ne.

Kurdistaneke serbixwe wê Kurdan fêrî berjewendiya gelemperî bike da ku ji ya şexsî dûr bikevin û ya neteweyî biparêzin.

Bi rastî jî diyarkirina roja refarandûmê di meha îlonê de girîng e. Ji ber di vê mehê de, ji bêdengiyê û tirsê xilas bûn. Ji ber Kurd di şoreşa îlonê de ji nû de şiyar bûn, di şoreşa gulanê de berxwedan û mafgirtin bû para wan û di refarandûma 21 îlona 2017an de Kurd dê bibin serbixwe û dewleta xwe ya Kurdî ragihîne ala xwe ya rengîn di nava alên cihanê de bilind bike..

Her weha ev refarandûm û berdewamiya wê Kurdistana serbixwe wê Kurdên dîasporayê ji bindestiyê û ji bêxwedîtiyê jî xilas bike. Kurdên dîsaporayê êdî wê bizanibin ku ne bêxwedî ne, di her warî de wê dewleta wan êdî xwedîtiyê li wan bike. Yanî em ê weke Kurdên dîaporayê ji sêwîtiyê xilas bibin.

Bila refarandûma ji bona serxwebûna Kurdistanê li gelê kurd pîroz be.

Têbinî: Ev nivîsa di roja 20/04/2017 an de di rojnameya hefteyî di Basnewsê de hatibû weşandin. Piştî giryargirtina roja referandûmê ku wê di 25 îlona 2017 pêk bê. Min pêwîstî nedît ku nivîseke nû binivîsînim û ji xebatkarên nerînaazad daxwaz kir ku ew vê ji nû de biweşînin. Her weha divê em ji bîr nekin gulleya rakirina bêdengiyê jî meha îlonê bû. Sipas bo Nerîna azad sipas bo rojnameya hefteyê Basnews.